生米 - 貪婪。奢侈 <六>

「好啦好啦食飯前要做咩架？」Frankie坐在飯枱的一端，合十雙手問乖乖坐在位置上的小朋友

Jeremy和AK則耐心的幫其中年紀較細的繫上餐巾

「祈禱！」小如舉手回答，Tiger在旁摸摸她的頭

「係啦, 咁我哋而家一齊祈禱先啦」Frankie說完便低頭禱告「親愛嘅天父…」

其他人也跟著照辦，AK不習慣的左右望望，卻被旁邊的Jeremy 粗暴地把他的頭按下，直至Frankie臨完成禱文前才放手

「食嘢!!」小霆興奮的拍手, Jeremy笑了笑把意粉夾到他的碟中, 便又起身走去幫其他小朋友分派食物

濤濤則在旁一邊流著口水一邊盯著他的意粉

小霆嘖了一聲「喂呀...你咪食咗嘢囉...做咩望住我啲意粉喎」

濤濤也不忿的呀呀叫了兩聲, 伸手過去就想搶

「縮手呀!」小霆大喊, AK立即走到二人座位中間

「喂唔好搶啦你哋」AK嘗試制止他們, 但無奈沒有人聽他的話

Jeremy看一看AK, 眼神詢問是否需要幫忙, AK回了一個笑容表示沒有問題, Jeremy就沒有再理會了

「你兩個停手先, AK哥哥再餵你食啦濤濤, 嗱飲果汁先好冇?」AK把一杯果汁塞到濤濤手中

「我停手佢就會搶走架啦!唔放呀!」小霆怕會弄傷濤濤, 不敢太大力搶回來

「呀呀呀!!」也不知濤濤在說甚麼, 反正就是要搶到眼前的食物

大家就這樣一來一回的爭奪, 一下子不小心果汁和意粉全都倒到AK身上, 白色衛衣瞬間染上一大灘橙橙紅紅的

「啊…」「嗚嗚哇哇哇…」

小霆跟濤濤兩個被突然間發生的意外嚇得哭起來

「我都未喊…」AK心想，這件衛衣可是向Jeremy借的，他發起脾氣上來可不易哄

「你除出嚟我幫你洗咗先啦，遲啲就好難洗」Frankie走過去

「好呀唔該」AK聽完便著手把它脫去，Jeremy則不其然的看著AK咽一下口水，怎料他還有一件黑色底衫在內，不禁反一反白眼，也不知自己在瞎期待甚麼

此時小如突然哭了「做咩事呀」Tiger緊張的問

「佢…有紋身！係壞人！」小如邊哭邊回答著

這也把旁邊的賢仔嚇哭了

「唔係呀，AK哥哥唔係壞人，佢鍾意畫畫所以將啲畫畫落自己身體度咋」Jeremy 抱起賢仔，又摸摸小如的頭安慰著

「呃…係呀…我好鍾意畫畫架…」AK苦笑的道

Frankie笑著搖搖頭，接過衛衣便走到浴室處理污漬

「係喀，我哋都可以係AK哥哥身上面畫畫架，我哋畫佢隻左手好冇？」Jeremy奸笑著說

「我去拎筆」Tiger衝上自己的房間

Jeremy帶著一眾小朋友走到AK旁邊，著手把他的袖都捲高

「你唔係咁玩我呀？」AK求饒般看向Jeremy

「你唔好唔記得你今日激嬲咗我幾次，係時候要還啦江𤒹生」

「……」自知自己沒得再逃的AK只好乖乖的閉上嘴

「筆到！」Tiger拿著十多枝不同顏色的衝回來

「好熱心喎」AK表面笑著，但額角的青筋快要暴裂出來

「要嘅，你過門都係客，招呼周到啲好」Tiger也笑著回答

「我哋只可以畫AK哥哥兩隻手臂知道未？」Jeremy沒有理會他們，把筆都分好後便帶著小朋友亂畫一通

「我要畫花花」「我畫飛機」

而年紀較細的濤濤不停畫交叉和剔，賢仔則畫了一個又一個的圓形

看見Jeremy正在埋首用心的畫，AK好奇的問「駿你畫緊咩？」

「尼斯湖水怪囉」Jeremy抬頭揚起好看的笑容「靚唔靚呀？」

AK一看，呆了一下，心想：乜尼斯湖水怪個頭有幾條毛架咩？

但又不想惹Jeremy生氣「咁以怪物嚟講都算幾靚嘅」

「咁敷衍架…」Jeremy 噘著嘴說，又低頭用力畫

把大大的 “蠢材” 二字畫上AK的左前臂

「喂你…」AK想要掙扎起來，卻被Jeremy按住

「咁緊張做咩啫，水筆嚟咋嘛，陣間幫你抹番囉」

「吓…唔係水筆喎…」Tiger正在幫自己畫上的小貓填色「我拎咗marker喎」

「咩話？！」Jeremy嚇得停下來，AK則死心般閉上眼睛「唔好畫啦唔準畫！個個收手呀！」

「吓…又係駿哥哥話可以畫既…」小霆扁嘴

「唔得呀！收番啲筆先！」Jeremy開始慌忙的把所有筆都從他們手中收起「虎你又係…做乜要拎marker」

「你都冇話要咩筆」Tiger聳聳肩，接過筆便走回房間放好

「死啦死啦…點算呀…」Jeremy急得快要哭出來「Sorry呀我真係唔知架」

「……唔緊要啦…咁我平時都著西裝多嘅，應該都遮到」AK摸摸Jeremy的頭「冇事冇事」

「真係？…Sorry呀…」

「最緊要係你唔再嬲…」AK笑了笑「點呀？下咗啖氣未？」

「……嗯…」Jeremy雙頰微微泛紅，點點頭

「好啦繼續食飯！」AK笑著看向其他人「濤濤係咪要意粉？」

晚餐在一片嬉鬧聲中完結

「皮皮我幫你洗碗呀」Jeremy欲幫忙收拾，卻被AK阻止了

「等我嚟啦，你去花園湊下班仔」AK把碗碟都疊好「我搞佢哋唔掂」

「第一打手AK竟然認輸？」Jeremy冷笑一聲，細聲的說

「…係呀…小朋友真心買佢哋怕」AK沒再理他，自顧自的把碗碟搬到廚房去

Jeremy 知道AK並不是真的討厭小朋友，而是希望自己有多點時間跟他們相處

AK從不擅長把自己的細心一一道出，但這也沒關係，Jeremy知道就好了

「唔該哂你喎」Frankie笑著的對AK說

「哈哈咁我有份食架嘛，幫手洗碗應該嘅」

「我係話，唔該你幫我照顧阿駿」Frankie沒有再望向AK，專心的刷著鍋底「佢最近真係開心咗好多」

AK看著Frankie，愕然的眨一眨眼「冇咩嘅，份內事啫」

「係咪真心呢，我呢個社工都仲識分嘅，你唔肯認我都唔會逼你」Frankie繼續說「反正你係佢心目中都係好重要」

「…係咩…？」

「佢久唔久就會提起下你咁囉」

「咁佢…有冇同你講過我係做咩架？或者佢係做邊行？」AK試探性地問

「冇呀，佢話我唔需要知，我咪唔問囉」

「你唔好奇咩？」

「講真」Frankie停下手部刷動的動作「每次見到咁大疊錢，你話唔驚唔擔心就假嘅，但我信阿駿佢識得自己衡量，佢從來都唔係衝動嘅人，只有處理負面情緒呢樣我要擔心」

「都係嘅，佢真係幾叻…」

「所以我好慶幸你陪住佢，雖然我唔知咩原因導致你兩個咁猶豫不決」

「你唔明架啦…有好多嘢都唔到我話事」AK苦笑

「咁總有啲嘢係你控制到架？例如兩個人一齊相處嘅時間，你對佢態度同語氣都可以令佢好開心」

「我估…可以嘅…」

「簡單一句，你愛唔愛佢？」

AK將目光投放到在花園笑得開懷的Jeremy，後者感受到視線抬頭跟他對看，笑得更燦爛了

「愛…我愛佢…」AK帶著微笑回應著

「咁咪得囉，大膽啲，最緊要唔好令自己後悔」Frankie 用手肘撞撞AK的膊頭

Jeremy此時把小朋友全都帶回屋內，Frankie隨即叫Tiger再次領一眾小朋友洗手「我切埋啲生果陣間食，阿駿你不如搵件褸俾AK，夜晚都仲涼涼地」

「哦，好呀」Jeremy 轉身便上樓

「你跟埋去啦，順便試埋呀嘛」Frankie急忙催促AK

「吓…哦」AK這才跟著Jeremy上樓

「唉…乜得咁蠢架…」